Makaloli a fannin kimiyya da fasaha!
A yau za mu karasa bayani kan sauran shahararrun manhajojin da suka ci duniya (kuma suke kan ci a yanzu) a duniyar Intanet, wajen aiwatar da wadannan aikace-aikace na cutarwa. Sai dai kuma, sabanin yadda nace a makon da ya gabata, ba za mu iya karkare bayanai cikin wannan mako ba, sai zuwa makonni uku nan gaba in Allah Ya yarda.
Idan mai karatu na tare da mu, muna yin bayani ne kan kwayoyin cutar kwamfuta da illolin su da kuma masu hakki wajen kirkiro wannan annoba. Har wa yau, a makon da ya gabata mun kawo bayanai kan tsarin da masu wannan al’ada ke bi wajen yada kwayoyin cutar da ke ma kwamfuta illa a duniya. A karshe kuma mai karatu ya samu bayanai kan tasirin wannan sana’a nasu, hatta ga siyasar duniya. A yau za mu ci gaba, inda za mu kawo hanyoyin da wadannan masana harkan kwamfuta ke bi wajen shiga kwamfutocin jama’a; ko dai don yada kwayoyin cuta, ko aiwatar da satan bayanai, ko kuma don sace ma jama’a kudade da kuma aikin leken asiri.
Cikin bayanan da muka fara kwararowa kan Kwayar Cutar Kwamfuta da nau’ukan ta da kuma yadda take haddasuwa, da masu kirkiran ta, mun tsaya ne a gabar da ke karantar da mu irin manufofin da masu wannan sana’a ke tinkaho dasu wajen yin dukkan wata ta’addanci da ta shafi cutar da kwamfutocin mutane a duniya. A yau za mu ci gaba, in da mai karatu zai ji bayani kan ire-iren ayyukan da wadannan ‘Yan Dandatsa (Hackers) suke yi wajen yada wadannan cututtuka da suke kirkira. Bayan haka, za kuma muji irin tasirin da hakan ke yi a duniyar yau. Kada mai karatu ya mance cewa a cikin kasidun da suka gabata, mun nuna cewa wannan sana’a ta Dandatsanci (Hacking), ta yadu sosai musamman cikin manyan kasashen da suka ci gaba wajen tsarin sadarwa ta zamani, irin su Amurka, Ingila, Awstiraliya, Sin, Jamus, Rasha da Jafan. Ina mana wannan matashiya ne don mu dada fahimtar yadda tasirin ayyukan su na Dandatsanci ke cin karensa ba babbaka a yau, kamar yadda za mu karanta a yau. Mu je zuwa, wai mahaukaci ya hau Kura.
‘Yan Dandatsa kwararru ne kan harkar kwamfuta da abin da ya shafi ruhinta, masu amfani da kwarewarsu wajen shiga kwamfutocin mutane ba tare da izni ba, a nesa ne ko a kusa ; masu aiko ma kwamfutoci cututtuka da dama, don satan bayanai ko aikin leken asiri. A takaice dai mutane ne masu mummunar manufa wajen kwarewarsu. A yau za mu leka duniyarsu ne don sanin hakikanin tsarin rayuwarsu : irin sunaye ko lakubbansu, gidajen yanar sadarwarsu, shahararrun littafai kan aikinsu, dabi’unsu da addininsu na dandatsanci da kuma shahararru cikin finafinan da aka yi kan sana’arsu. Ga fili ga mai doki.
A yau za mu yi nazari ne kan wasu shahararrun ‘yan dandatsa, wato “Hackers” da hukumomi suka damke su, sanadiyyar ta’addancin da suke aikatawa.
