Tsaga a Jikin Wata: Mu’jiza ko Yawan Shekaru? (1)
Sanadiyyar samuwar wani hoto dake dauke da wata, wanda a jikinsa wata alama ta bayyana mai kama da tsaga, jama’a sunyi ta yaya batu cewa ai wannan tsaga dake jikin hoton wannan wata, asalin tsagar da Allah ke ishara gare ta ne a Al-Kur’ani, wanda ya faru a zamanin Manzon Allah (SAW). Hakan ba abin mamaki bane idan ya tabbata. Sai dai kasancewar duniyar Intanet akwai kwamacala da yawa, yasa na ga dacewar gudanar da bincike don kokarin tabbatar da hakikanin wannan hoto. Shin da gaske asalin hoton wata ne, ko dai za na shi kawai aka yi da manhajar kwamfuta? A wannan mako kasidarmu za ta fara da mukaddima ne kan abin da ya shafi shi kanshi wata; girmansa, da kusancinsa da duniyarmu, da yanayin mahallinsa, da dai sauran bayanai.
